काठमाडौं। नेपालले आज यूएईसँग टी–२०आई सिरिज अन्तर्गत पहिलो खेल खेल्दैछ। यो खेल कीर्तिपुरस्थित टियु मैदानमा बेलुका ५ बजे सुरु हुनेछ र नेपालले फ्लडलाइटमा पहिलोपटक अन्तर्राष्ट्रिय खेल खेल्न लागेको हो।
साथै, दुई वर्षपछि घरेलु मैदानमा अन्तर्राष्ट्रिय खेल खेल्न लागेको नेपालका लागि यो एक ऐतिहासिक क्षण हुनेछ।
नेपाली टोलीको कप्तानी दीपेन्द्र सिंह ऐरीले गर्नेछन् किनभने नियमित कप्तान रोहित पौडेल आजको खेलमा उपलब्ध हुनेछैनन्। रोहितलाई स्क्वाडमै राखिएको छैन। दीपेन्द्रलाई जितसँगै सिरिजको सुरुवात गर्ने चुनौती छ।
नेपाल र यूएई चीर परिचित प्रतिद्वन्द्वी हुन्। टी–२०आईमा दुई टोलीबीच ११ खेल भएका छन्, जसमध्ये नेपालले ६ खेल जितेको छ र यूएई ५ पटक विजयी भएको छ। कीर्तिपुरमा एकमात्र खेल हुँदा उक्त खेल यूएईले जितेको थियो।
नेपाली टोलीमा दीपेन्द्र सिंह ऐरी (कप्तान), कुशल भुर्तेल, कुशल मल्ल, सन्दीप जोरा, आरिफ शेख, बसिर अहमद, गुलशन झा, लोकेस बम, सन्दीप लामिछाने, नन्दन यादव, सन्तोष यादव, अर्जुन साउद, हेमन्त धामी, साहब आलम, र शेर मल्ल समावेश छन्।