प्रधानमन्त्रीको अभिव्यक्तिप्रति 'जेन-जी' अभियन्ता रक्षा बमको आपत्ति; 'राजनीति गुरुबाट मात्र होइन, नेतृत्व र संघर्षबाट सिकिन्छ'

काठमाडौँ, २०८३ वैशाख २३

नयाँ पुस्ता (Gen Z) को आवाजलाई प्रतिनिधित्व गर्दै अभियन्ता रक्षा बमले प्रधानमन्त्री बालेन शाहको राजनीतिक दृष्टिकोणमाथि प्रश्न उठाएकी छन्। प्रधानमन्त्री शाहले "विद्यार्थीले राजनीति नेताको भीडबाट नभई गुरुबाट सिकून्" भनी दिएको अभिव्यक्तिको प्रतिवाद गर्दै बमले राजनीति निरन्तर अभ्यास, सामूहिक संघर्ष र नेतृत्वबाट सिकिने व्यावहारिक प्रक्रिया भएको बताएकी छन्।

सामाजिक सञ्जालमा लेख्दै अभियन्ता बमले प्रधानमन्त्रीलाई प्रश्न गरेकी छन्, "विद्यार्थीले किन बीपी कोइराला, मदन भण्डारी, पुष्पलाल श्रेष्ठ वा प्रदीप गिरी जस्ता ऐतिहासिक नेताहरूबाट राजनीति नसिक्ने?" उनले प्रधानमन्त्री स्वयं पनि विगतमा राजनीतिक दलको भ्रातृ संगठनको क्याम्पस इकाइ अध्यक्ष भएरै राजनीति सिकेको र बेथितिविरुद्ध आवाज उठाउन थालेको स्मरण गराएकी छन्। "सबै छोड, मैले जहाँबाट भन्छु त्यहीँबाट राजनीति सिक भन्ने विचार कुन मानसिकताको उपज हो?" उनले प्रश्न गरेकी छन्।

अध्यादेशमार्फत विद्यार्थी संगठन र ट्रेड युनियन खारेज गर्ने सरकारको निर्णयलाई 'स्वेच्छाचारी' संज्ञा दिँदै बमले यस्ता निर्णयहरूको प्रतिरक्षा गर्न कठिन हुने टिप्पणी गरेकी छन्। उनले प्रधानमन्त्रीलाई नागरिक समाज, ट्रेड युनियन र सरोकारवालाहरूसँग बसेर छलफल र संवाद गर्न आग्रह गरेकी छन्। देशको विकासका लागि निषेधको राजनीतिभन्दा सहकार्यको हात बढाउन उनले प्रधानमन्त्रीलाई सुझाव दिएकी छन्।