काठमाडौँ - २९ फाल्गुन, २०८२
नेपाल आयल निगमले बजारमा खाना पकाउने एलपी ग्यासको अभाव नहुने आश्वस्त पार्दै आम उपभोक्ताहरूलाई आवश्यकता भन्दा बढी ग्यास सञ्चिति नगर्न आग्रह गरेको छ। निगमका प्रवक्ता मनोज ठाकुरले ग्यासको आयात निरन्तर र नियमित रूपमा भइरहेको स्पष्ट पारेका छन्।
आपूर्ति र खपतको अवस्था: प्रवक्ता ठाकुरका अनुसार, नेपालको मासिक ग्यास खपत करिब ४५ देखि ४६ हजार मेट्रिक टन रहेको छ र सोही परिमाणमा हरेक महिना आयात भइरहेको छ। चालु महिनाको फागुन २६ गतेसम्म मात्रै ४५ हजार ५०० मेट्रिक टन ग्यास आयात भइसकेको तथ्याङ्क निगमले सार्वजनिक गरेको छ।
उपभोक्तालाई आग्रह र सुरक्षा सतर्कता: "ग्यासको आपूर्तिमा कुनै समस्या छैन, त्यसैले घरघरमा ग्यासको भण्डारण गरेर अनावश्यक जोखिम नमोल्न म सबैमा आग्रह गर्दछु," प्रवक्ता ठाकुरले भने। निगमले ग्यासको बिक्री वितरणलाई सहज बनाउन निरन्तर निर्देशन दिइरहेको र कहीँकतै अनियमितता वा कृत्रिम अभाव सिर्जना गरिएको पाइएमा तुरुन्त सूचना दिन समेत उपभोक्ताहरूलाई अनुरोध गरेको छ।
पछिल्लो समय मध्यपूर्वी मुलुकहरूमा विकसित राजनीतिक घटनाक्रमका कारण उपभोक्ताहरूमा त्रास फैलिएको र ग्यासको माग अचानक बढेको पाइएपछि, निगमले सावधानीस्वरूप ग्यास उद्योगहरूलाई आधा सिलिण्डर मात्र ग्यास भर्न निर्देशन दिएको छ। यसै निर्देशन अनुरूप ग्यास उद्योगहरूले आजदेखि ७.१ किलो ग्यास भरिएका सिलिण्डरहरू बजारमा पठाउन सुरु गरेका छन्।