२० फागुन, काठमाडौं । ओपनर फिन एलेनको विष्फोटक कीर्तिमानी शतकको मद्दतले न्युजिल्यान्ड आईसीसी टी–२० विश्वकप २०२६ को फाइनलमा प्रवेश गरेको छ। बुधबार सम्पन्न पहिलो सेमिफाइनलमा दक्षिण अफ्रिकालाई ९ विकेटले स्तब्ध पार्दै न्युजिल्यान्ड उपाधि नजिक पुगेको हो।
कोलकातास्थित इडेन गार्डेन्समा दक्षिण अफ्रिकाले प्रस्तुत गरेको १७० रनको लक्ष्य न्युजिल्यान्डले मात्र १२.५ ओभरमा १ विकेट गुमाएर पूरा गर्यो।
एलेनको ऐतिहासिक 'पावर हिटिङ'
न्युजिल्यान्डका ओपनर फिन एलेनले केवल ३३ बलमा शतक प्रहार गर्दै इतिहास रचे। यो टी–२० विश्वकप इतिहासकै सबैभन्दा छिटो (Fastest) शतक हो। उनले आफ्नो इनिङ्समा १० चौका र ८ छक्का वर्षा गरे। सुरुदेखि नै आक्रामक देखिएका एलेनले १९ बलमा अर्धशतक पूरा गरेका थिए भने त्यसपछिको ५० रन मात्र १४ बलमा बटुलेका थिए।
खेलको १३औँ ओभरमा उनले मार्को यानसेनलाई निसाना बनाउँदै तीन चौका र दुई छक्कासहित २४ रन जोडे। स्कोर बराबरी भएको अवस्थामा पाँचौँ बलमा चौका प्रहार गर्दै उनले न्युजिल्यान्डलाई जित दिलाए र व्यक्तिगत रूपमा टी–२० आईमा आफ्नो तेस्रो शतक पनि पूरा गरे।
साझेदारी र बदला
एलेन र टिम सेफर्टले पहिलो विकेटका लागि ९ ओभरमा ११७ रनको विष्फोटक साझेदारी गर्दै जितको बलियो आधार तयार पारेका थिए। सेफर्टले ३३ बलमा ७ चौका र २ छक्काको मद्दतले ५८ रनको योगदान दिए। रचिन रविन्द्र १३ रनमा अविजित रहे। दक्षिण अफ्रिकाका लागि कगिसो रबाडाले मात्र एक विकेट लिन सके।
यो जितसँगै न्युजिल्यान्डले समूह चरणमा दक्षिण अफ्रिकासँग बेहोरेको ७ विकेटको हारको बदला समेत लिएको छ। साथै, टी–२० विश्वकपको इतिहासमा न्युजिल्यान्डले दक्षिण अफ्रिकालाई पराजित गरेको यो पहिलो पटक हो। यसअघिका पाँचै भेटमा न्युजिल्यान्ड पराजित भएको थियो।
दक्षिण अफ्रिकाको संघर्ष
यसअघि टस हारेर पहिले ब्याटिंगको निम्तो पाएको दक्षिण अफ्रिकाले निर्धारित २० ओभरमा ८ विकेट गुमाउँदै १६९ रन जोडेको थियो। एक समय ७७ रनमा ५ विकेट गुमाएर संकटमा परेको दक्षिण अफ्रिकालाई अलराउन्डर मार्को यानसेन र ट्रिस्टन स्टब्सले ७३ रनको साझेदारी गर्दै उकासेका थिए। यानसेनले ३० बलमा अविजित ५५ रनको अर्धशतकीय इनिङ खेले भने डेवाल्ड ब्रेभिसले ३४ र स्टब्सले २९ रन जोडे।
न्युजिल्यान्डका लागि म्याट हेनरी, कोल मेकोन्की र रचिन रविन्द्रले समान २–२ विकेट लिए। कप्तान मिचेल सान्टनर र जिमी नीशमको नाममा १–१ विकेट रह्यो।
फाइनल समीकरण
न्युजिल्यान्डले अब उपाधिका लागि भारत र इंग्ल्यान्डबीच हुने दोस्रो सेमिफाइनलको विजेतासँग प्रतिस्पर्धा गर्नेछ। विश्वकपको फाइनल भिडन्त फागुन २४ गते आइतबार (मार्च १०) गुजरातको अहमदाबादस्थित नरेन्द्र मोदी स्टेडियममा हुनेछ।